金價後市繫於聯儲局決心

節錄於2007年2月3日-信報:投資者日記

當一隻股份跌至五十二周新低, 可能有兩大原因:一、該公司十分糟糕, 什至存在欺騙成分。二、股票市場過分睇淡, 一次大反彈將出現。今年1月恆生指數創新高後, 喺2月份投資者應該睇睇嗰D創五十二周新低嘅股份, 股價極有可能喺未來五十二星期內有明顯反彈, 即使唔係平地一聲雷, 起碼日後抗跌力特強(因為已跌至五十二周新低, 下跌空間肯定有限)。1992年起由Mertz管理嘅Forward Emerald Growth Fund, 響過去十五年大部分日子跑贏大市, 佢地嘅投資策略就係專吼細價但有增長潛力股。近期恆生指數喺20000點之上橫行, 上述投資策略係咪有參考價值?

金價喺2006年5月見七百三十美元後, 回落至6月份五百七十美元, 就響呢個水平上上落落。 金價後市點睇?黃金死敵係美元, 如美元存款利率高於美國CPI增長率, 對金價不利; 如美元存款利率低於美國CPI增長率, 對黃金有利。

本周聯邦基金利率維持五厘二五, 核心通脹率2.1%, 即去年5月開始美元對黃金長期走勢又再不利。雪茄伏響1979年年底上台後, 一下子將利率提升至CPI增長率二厘或以上, 1980年起黃金從此被制伏, 由1980至2001年美元利率一直維持喺CPI增長率二厘之上, 此乃金價動彈不得嘅最大理由。 2001年「九‧一一慘劇」後格蛇擔心衰退出現, 一下子將美元利率大幅降低, 令黃金由2001年10月起復活。去年5月發生咗乜嘢事? 就係聯邦基金利率再次高於CPI增長率二厘, 令2001年10月復甦嘅金價即使未死, 起碼亦進入冬眠。 至今為止, 估計地面上黃金約五十億盎斯, 市價三萬二千億美元, 黃金年產量只有七千六百萬盎斯, 即黃金供應量每年只增加1.5%; 反之, 全球貨幣供應量近十年嘅年增長率10%(中國更達18%)。上述因素令金價喺去年6月見五百七十美元後再跌唔落去。依家金價響七百三十美元至五百七十美元上落, 最後何去何從? 就睇美國聯儲局係咪決心維持利率喺CPI增長率之上二厘而定。

IMF因入不敷出及預算開支出現赤字, 考慮出售價值六十六億美元嘅黃金儲備, 計劃將所得現金投資於風險更高但回報更豐厚嘅證劵市場。該委員會主席、摩根大通國際總裁Andrew Gochett認為, 喺出售四百噸黃金時, 不應令市場產生波動, 必須維持黃金市場秩序良好, 穩定。IMF依家擁有九十億美元現金及三千二百一十七噸黃金, 出售四百噸黃金用作投資, 估計每年可提供投資收益一億九千五百萬美元。

去 財經金融資訊