其實每個人內心深處都有一根火柴（或叫心魔）而不自知。七十年代我老曹打工嗰間投資公司，當年生意已做得很大，但老闆唔知為乜嘢，忽然跑去美國遊埠而唔理公司死活，剛好遇上1973年3月股災，結果公司嘅投資一敗塗地。過去幾十年，亦眼見唔少朋友曾擁有幸福家庭，但丈夫忽然狂賭或結識另一異性，搞到翻天覆地。去年唔少上市公司高層忽然玩起Accumulator，累到今年公司損失慘重。人好多時就係咁非理性、頑固不冥、思想狹隘。當年我老曹仲細，為咗同爺爺鬥氣（今天已忘記鬥乜嘢氣），居然想一把火燒掉佢辛苦建成嘅房子。今天我老曹時常提點自己──千萬不要燃着心中嗰根火柴（心魔），因為佢可以毀掉你一生所有。千萬不要因一時衝動而做出一生悔恨嘅事。
信報-投資者日記20081129
學習反向思維、學習財務分析。我老曹從來唔信「畫畫吓」就可以發達；我老曹唔否定走勢分析嘅用途，但切勿將走勢講到天下無敵。世界上冇一個有錢佬係靠睇走勢發達嘅（賣走勢分析搵錢者就大把）。一如投機同投資，一般人以為揸長線就係投資、短線就係投機，觀念上完全錯誤。揸長線可以係投機（例如去年10月到今年10月），揸短線亦可以係投資（如方向正確）。投機係指喺投資之前唔做功課；如事前做足功課，响十拿九穩情況下才出擊就係投資。唔做功課，無論揸長線或短線都係投機；反之，去年11月拋空亦可以係投資，理由係拋空前已做足功課，才決定做一隻醒目嘅熊。我老曹最憎讀者問攞冧巴（自己唔做功課，如果咁都可以賺到錢真係天冇眼，蝕本則係應該。股票市場85％係輸家，咁唔小心謹慎嘅投資者又點會係贏家？）。一般人喜歡聽「誤導分析」，例如蝕本就長揸、遲早升番，而唔喜歡聽真實說話──例如止蝕唔止賺。另一句誤導係「明天會更好」！1974年7月我老曹入市後，等咗一百八十天才發現「明天將更差」！任何虧損一旦達15％便立即止蝕，No question asked！從前沙田有塊石叫望夫石，她的丈夫出海捕魚可能浸死咗，但她天天仍上山望夫歸，最後變成石頭丈夫仍不歸。作為愛情故事係好動人，作為投資者則好戇居。
信報-投資者日記20081129
經歷過1974年熊市打擊後，我老曹同妻子有一個協議：就係每月生活開支不得超過每月薪金收入。大部分人日常生活所需其實唔多，但欲望則無窮。三十三年過去，我老曹一直嚴守呢個規定，即家庭開支只可來自薪金收入，投資回報則留作「不時之需」，因為呢方面收入來源太唔穩定。上述規定限制咗我老曹嘅個人欲望，而令家庭一直過住好簡單嘅生活──既無華衣美服，亦無豪華房車，甚至出國旅行亦好少。有時諗番：有幾多人將生活所需與個人欲望混淆不清？例如美食唔一定係鵝肝、魚子醬，好多時餐蛋公仔麵亦好美味，尤其係肚餓之時。有朋友曾請飲過價值數萬元一枝紅酒，老實講，我老曹唔識貴在哪裏?!亦坐過朋友過百萬元嘅保持捷跑車，但我老曹仲係喜歡坐的士，因為夠方便。生平最怕上朋友嘅遊艇，因我老曹唔愛水上運動，上咗船都唔知做乜好。
信報-投資者日記20081115
右手賺錢左手make money
我老曹認為二十五歲前應努力學習，包括讀書及投資技巧。二十五歲到五十五歲係黃金三十年，右手應努力賺錢，左手應努力make money。唔少人只懂運用右手賺錢，例如由月入1萬餘元到10萬元。由於唔識同時用左手make money，喺面對退休之年，手上所剩下財富唔夠自己過舒適退休生活。過去四十多年，香港經濟高速成長，每年令資本增值15％並不苛求；即1967年1萬元到去年變成267萬元；成績好一D年增長率達20％，即1萬元投資到去年可變成1224萬元。成績更好亦大有人在。
如你同時係運用左手高手，年紀漸大後、一般亦開始進入charity生涯。charity唔係一次性捐款行為，而係協助某機構達致某D目標，例如協助非牟利機構，為社會提供服務及減少貧窮因素。當然救急扶危亦重要，例如四川地震之後救援工作或中國雪災之後支援；不過，真正改變貧窮唔係呢D工作，而係向人投資，包括提供技術、制度、醫療及教育援助，從基本層面上改變導致貧窮因素，呢D先係charity。至於救急扶危只係一項施捨，冇長久意義；例如捐助100元畀慈善機構去買D月餅送畀老人亦係好事，但基本上你冇改變乜嘢。今年8月微軟主席蓋茨捐助500萬美元畀Techno Serve為發展中國家企業提供設備去創造就業機會，就更加有意義。另一機構叫做Bridgespan，嚟自Bain & Co顧問公司分支，佢唔係協助慈善機構而係追查慈善機構金錢用途，包括overhead方面開支。例如有D慈善機構話營運開支只佔總捐款13％至22％，調查後卻發現佔總捐款17％至35％。透過佢地追查，捐款者知道邊D慈善機構喺運用善款方面最有效率，邊D營運開支佔捐款比重太大。調查亦發現，連續性每年唔受限制用途捐款，較一次性大筆捐款能產生更大效益。慈善機構依賴較多人捐較低數字銀碼，較依賴一、兩個知名人士大筆捐善款來源更可靠。今年已有唔少大人物削減捐款數字；反之，普通人每月捐款卻冇減少。
作為普通人，成立自己慈善機構並唔容易（因財力及物力太小），最好係加入已成立並有良好業績機構。唔使一次過大筆捐款，而係持續性（例如每月數百元）捐款，咁樣做對呢個機構幫助最大。
五十五歲或以上嘅人，右手工作遲早要停低，左手則應繼續make money。亦係應該開始charity日子，利用charity取代打工賺錢，可以令人好忙而不知老之將致。自私D講，從事charity乃令自己心境保持青春及愉快不二良方，正係多有多做、少有少做。找一間慈善機構理念同你相近者，作為恒久捐助者。可以係每月一百幾十，保證令你身心愉快。例如資助貧窮小孩上學去，每當收到佢地成績表之時，已可令你快樂一整天。
請好好運用你嘅右手，從過去搵錢打工轉為慈善事業，以免右手因少勞動而變得不靈巧。
信報-投資者日記20081115
